Ешкімнен жеңіліп көрмеген Қанат Ислам 24-жеңісіне қол жеткізді
АҚШ-тың Бока Ратон қаласында өткен жекпе-жекте кәсіпқой қазақ боксшысы Қанат Ислам мексикалық Норберто Гонсалесті айқын басымдықпен жеңді. Кезекті жеңісінен кейін Қанат екі бірдей титулға ие болды – WBO NABO және WBA Inter-Continental.
Бұл туралы Vesti.kz хабарлады.
Алғашқы раундтарда Қанат Ислам қарсыласын шабуылдап, жекпе-жекті өз бақылауында ұстады. Алайда Гонсалес те осалдық танытқан жоқ. Қорғанумен қатар ол контршабуылдар жасады. Бірнеше рет отандасымыздың денесіне соққы жұмсады. Алайда Қанат ештеңе болмағандай күй танытып, жекпе-жекті өзіне сенімді түрде жалғастырды.
Кездесу 12-раундта Қанаттың жеңісімен аяқталды.
Осылайша ешкімнен жеңіліп көрмеген Қанат Ислам 24-ші жеңісіне қол жеткізді. Қанат 24 кездесудің 19-ын нокаутпен аяқтаған. Ал Гонсалес 23 рет жеңіске жетіп, 9 рет қарсыласына есе жіберіп қойған.
Бір қызығы, Гонсалес Исламнан 4 жасқа үлкен және оның кәсіпқой рингтегі мансабы Қанатпен салыстырғанда 5 жыл бұрын басталған.
Еске сала кетейік, бұған дейін осы рингте қазақстандық Жанқош Тұраров месикалық қарсыласын техникалық нокаутпен жеңген еді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе