“Бізге жала жапты”. Ақтөбеде қызына күн бермеген деген ата-ана мұнарадан секіріп кетті

16 мамыр 2017, 11:00

Ақтөбе қаласы маңындағы Қурайлы ауылында 7 жасар Кристина Шустерді өгей анасы соққыға жыққан. Қазір мектеп оқушысы ауруханада жатыр. Ал кешкілік полицияға белгісіз біреу хабарласып, Қурайлы ауылындағы мұнара басына ерлі-зайыпты Шустер мен Дүйсенованың шыққанын, олар өз-өзіне қол жұмсайтындары туралы айтып қорқытқанын жеткізді.

«Оқиға орнына жергілікті атқарушы органдар мен құқық қорғаушылар барды. Мұнара басына шыққан ерлі-зайыптылар арасында келіссөз жүрді. Дегенмен екеуі де келісімге келмей, биіктен секіріп кетті»,- деп хабарлады облыстық ішкі істер департаментінің баспасөз қызметі.

Келіссөз 2 сағатқа созылғанымен, еш нәтиже бермеген. Владимир Шустер мен Әсел Дүйсенбаева оқиға орнында көз жұмды.

Айта кетейік, осы келеңсіз жағдай бойынша облыстық ішкі істер департаменті Қылмыстық кодекстің «Өзін-өзі өлтіруге дейін жеткізу» бабы бойынша іс қозғады. Бірнеше сараптама тағайындалып, тергеу басталды.