Ақтөбе дәрігерлерін СПИД дертіне шалдыққандардың емшілерді жағалап жүргені алаңдатады

Ақтөбеде жыл басынан бері 4 адамнан СПИД дерті анықталды. Олардың арасында нашақор мен гомосексуалда бар.

Науқастар арнайы мекемеден тегін дәрі-дәрмек алмай тәуіптерге қаралуын тоқтатар емес, деп хабарлайды ҚазАқпарат.

Бір жыл ішінде Ақтөбеде СПИД жұқтырған 40 адам тіркелді. Олардың үшеуі – шетелдік азамат, біреуі – азаматтығы жоқ адам. Дерт жұқтырғандардың басым бөлігі ер адамдар.

«СПИД көбіне жыныстық жолмен жұғады. Нашақорлар арасында да тез таралады. Бір қиыны, өткен жылы 20-29 жас аралығындағы жастардың саны артып, СПИД дерті анықталғандардың 47 пайызын құрады. Науқастар арнайы мекемелерде берілетін тегін дәрі-дәрмекті пайдаланбай, өз бетімен қазақы емді жағалап кетеді. Емшілерге барып, шөптен дайындалған тұнбаларды ішеді. Өкініштісі, олар тек уақыт өткізіп жатыр»,- дейді «Ақтөбе Арасан» ЖШС профилактикалық бөлім меңгерушісі Айжан Жайлаубаева.