Кремлдің мәлімдеуінше, ресми Мәскеудің Черногория премьер-министрі Мило Джукановичке қарсы әзірленген қастандық әрекетке қатысы жоқ.
Ресей президентінің баспасөз хатшысы Дмитрий Песковтың журналистерге хабарлауынша, Черногориядан төңкеріс жасау талпынысын зерттеуге қатысты ешқандай сұрау түскен жоқ.
Жексенбі күні Черногорияның арнайы прокуроры Миливое Катничтің мәлімдеуінше, 16 қазанда парламент сайлауынан соң елдегі билікті басып алып, тәртіпсіздік орнату талпынысының артында ресейлік ұлтшылдар тұр. Оның хабарлауынша, сол күні Черногорияға шамамен бес жүзге жуық адам келуі тиіс болған, олар премьер Джукановичті өлтіріп, билікті тайдыруды жоспарлаған.
Катничтің айтуынша, террорлық операцияға дайындық Черногория, Сербия және Ресей аумақтарында жүргізілді.