800 мың теңгенің орнына 14 мың: тұтынушылар билет ақшасын қалай қайтарды?
Жетісу облысының 16 тұрғыны Астанаға тойға баруды жоспарлап, шамамен 800 мың теңгеге алдын ала әуе билеттерін сатып алған, алайда салтанатты шара өтпей қалған. Жолаушылар билеттерді қайтармақ болғанда, өтемақы мөлшері оларды таңғалдырды: жүздеген мың теңгенің орнына олар барлығына 14 мың теңгеден сәл асатын сома алған, деп хабарлайды Tengri Travel.
Тұтынушылардың құқықтарын қорғау комитетінің мәліметінше, Жетісу облысы мен Алматы тұрғындары Астанадағы отбасылық жиынға бару үшін алдын ала 16 әуе билетін рәсімдеген. Сатып алудың жалпы сомасы 765 248 теңге болды.
«Азаматтар қаражат толық көлемде немесе әуе тасымалы шарттарында көзделген ең аз ұстап қалумен қайтарылады деп үміттенген», – деп хабарлады комитеттегілер.
Бірақ толық соманың орнына сатып алушыларға небәрі 14 840 теңге қайтарылған, бұл әр билет үшін бар болғаны 927,5 теңгеден келеді.
Мұндай сомамен келіспеген Жетісу тұрғындары облыстық Сауда және тұтынушылардың құқығын қорғау департаментіне жүгінді. Департамент істің мән-жайын зерттеп, өтініш берушілерге келесідей көмек көрсетті:
- тұтынушылардың құқығын қорғау туралы заңнама нормаларын түсіндіру;
- сатушы компания мен әуе тасымалдаушының атына қаражатты толық көлемде қайтару талабымен сотқа дейінгі шағым дайындауға жәрдемдесу.
Дау билет сатып алушылардың пайдасына шешілді.
«Шағым түсіп, департамент араласқаннан кейін дау сотқа дейінгі тәртіппен реттелді. Нәтижесінде екі тәулік ішінде тұтынушыларға 765 248 теңге көлеміндегі қаражат толықтай қайтарылды», – деп атап өтті комитеттегілер.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе