Қазір сәнді спиннер деп аталатын бала ойыншығы қазақтың ұлттық ою-өнері нақышында жасалып шықпақ.
Оның эскизін Ерлан Сәкенов есімді блогер Facebook-тегі жеке парақшасында жариялады. Мұндай жобаны Qazaq Spinners компаниясы қолға алыпты. Әзірге шығатын көлемі шектеулі екен.
Екі нұсқасы қарастырылып отыр: бірінде EXPO 2017 көрмесінің логотипі, екіншісінде Қошқар мүйіз ұлттық ою-өрнегі бейнеленбек.
Бұл реттегі желідегі қауымның пікірі әрқилы:
“Мынан үшкір затты баланың қолына беруге болмайды”, – деп жазды өз жазбасында Гулнәр Әбуова.
“Қазақы оюмен шықса міндетті түрде балаларыма сатып алып беремін”, – деп жазады тағы бірі.
“Қазір балалардың қолындағы сәнді ойыншық. Түк мән-мағынасы жоқ. Бағасы удай қымбат, 10 мың теңгеге дейін барады. Жәй кәдімгі білік қой”, – деп жазды Айбек Алкенов деген желі қолданушысы.
Расында, ойыншық сәнді. Пластикалық, сол секілді темірден жасалғаны бар, жанатын жарығы бар.
Спиннерді жасағысы келгендер оның металдан болатынын айтады.
“Ұлттық ою-өрнекті әлемдік трнедке айналдырғымыз келеді, сол секілді ЕХРО көрмесіне келушілерге де естелік зат секілді болса дейміз” – дейді олар.
Жоба жетекшісі Досан Каумен
бір спиннердің құны 6 мың теңге болатынын айтады.