2017 жылы Парламент пен Үкіметтің жауапкершілігі күшейтіледі – ҚР Сенат төрағасы
2017 жылы Парламент пен Үкіметтің жауапкершілігін күшейту мәселесі жан-жақты зерделенеді.
Бүгін ҚР Парламенті Сенатының Төрағасы Қасым-Жомарт Тоқаев осылай мәлім, деп хабарлайды ҚазАқпарат.
«Құрметті әріптестер, Елбасы атап өткендей, біз ел дамуының келесі 25 жылдық кезеңіне қадам бастық. Президент Тәуелсіздігіміздің 25 жылдығына арналған салтанатты жиында сөйлеген сөзінде мемлекет дамуының жаңа сатысына көшу жағдайында Парламент пен Үкіметтің жауапкершілігін күшейту мәселесін күн тәртібіне қойған болатын. Алдағы уақытта осы маңызды мәселе жан-жақты терең зерделеніп, тиісті заңдарға өзгерістер енгізу бойынша ұсыныстар әзірленетін болады. Сенаторлар мемлекеттік басқару жүйесін одан әрі жаңғыртуды көздейтін маңызды заң жобаларымен жұмысты кәсіби тұрғыдан жүргізетініне мен кәміл сенемін»,-деп атап өтті Тоқаев Сенаттың жалпы отырысында.
«Жаңа мемлекет құру мен реформалардың ең алдымен күшті президенттік билік арқылы ғана қамтамасыз етілетінін Тәуелсіздік тарихы көрсетіп берді. Мемлекет дамуының жаңа сатысы елдегі істердің жағдайы үшін Парламент пен Үкіметтің жауапкершілігін күшейту мәселесін күн тәртібіне қойып отыр. Қазақстан біздің Конституциямызда көрсетілгендей, президенттік басқару формасындағы мемлекет болған, қазір де солай және алда да солай бола береді. Сонымен бірге, өкілеттіліктерді Президент, Үкімет және Парламент арасында бөліске салу мәселесін қарайтын уақыт та келді. Арнайы комиссия осы мәселелерді зерттеп, тиісті заңдарға, мүмкін Конституцияға да өзгерістер енгізу бойынша ұсыныс енгізуі тиіс», – деді Мемлекет басшысы.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе