Министрлік райынан қайтты. АИ-80 жанар-жағармайы құнының шекті бағасы белгіленді

120 просмотров

Бір ай бұрын бағаны еркіне жіберу туралы ойларын ортаға тастап, елді бір дүрліктірген ҚР Энергетика министрлігі, ақыры АИ-80 жанар-жағармайының шекті бағасын белгіледі.  АИ-80 жанар-жағармайының 1 литрінің шекті бағасы 89 теңге болып нақтыланды.

Үстіміздегі жылдың 15-маусымында үкімет отырысында энергетика министрлігі АИ-80 жанар-жағармайының құнын реттеуді доғарып, бағаны еркіне жіберуі мүмкін екенін меңзеген еді. Оған үш себеп бары айтылды.

Біріншісі, АИ-80 жанар-жағармайының көршілес мемлекет — Ресейде қымбаттығы.

Екіншісі,  бензиннің бұл түрі елімізде көп тұтынылады. Жеңіл көлігі бар қазақстандықтар АИ-92 емес, бағасы әлдеқайда арзан АИ-80 жанар-жағармайын сатып алып, көлігін бүлдіретін көрінеді.

Үшіншіден, арзан бензинді сатып алғандар ауаны ластайды-мыс.

Бағаны қымбаттату үшін осындай дәйектер келтірген министрліктің әрекеті отандық сарапшылардың ашу-ызасын туғызған.

Мәселен, сол кезде біздің медиа-порталға пікір білдірген халықаралық экономика сарапшысы Алғатбек Қыдырбекұлы:

— Министрліктің бағаны қымбаттатып, қазақстандықтарды АИ-80 емес, АИ-92 жанар-жағармайын алуға мәжбүрлейік деуі — барып тұрған бассыздық. Шетелде АИ-80 маркасы мүлде өндірілмейді. Өйткені, олар сапасыз нәрсені өндірмейді. Сондықтан олар бұл арада баға емес, негізінен, сапаға бастарын ауыртулары керек.

Бірақ, оларды қазақстандықтардың да, қоршаған ортаның да жайы емес, жеке мүддесі қызықтырады ғой. Соны ашық танытып отырған министрлік қалай қорықпайды? Олар оны 99 теңге емес, 120 теңгеден неге сатпаймыз деп ойлайды. Көкейді тесіп бара жатқан тек өздерінің пайдасы, — деген еді.

Ақыры, қоғамның тамырын басып көрген министрлік бастапқы ойынан тайып, шекті бағаны белгіледі. Бірақ бұл қаншаға созылар дейсіз? Қай күні қайтадан бүлінер екен?..

Еске сала кетелік, аталмыш министрлік „ҚР Энергетика министрлігінің 2016 жылдың 19-мамырындағы „Бағаны мемлекеттік реттеп, анықтау арқылы мұнай өнімдерінің бөлшек саудадағы шекті бағасын белгілеу туралы„ №361 бұйрығының жобасын әзірледі.

Онда „Қосымша құн салығын есепке ала отырып, АИ-80 жанар-жағармайының 1 литрі 89 теңге болып белгіленсін„ делінген.

Загрузка...