Ақтөбеде мектеп бітіру кештері болмайды деген ақпарат жоққа шығарылды

36 просмотров

5 маусым күнгі лаңкестік оқиғаға байланысты Ақтөбеде мектеп бітіру кештері ұйымдастырылмайды деген ақпарат негізсіз деп хабарлайды «Ақтөбе ақпарат».

Ақтөбе облыстық білім басқармасы басшысының міндетін атқарушы Руслан Бегімбетовтің айтуынша, 17 маусым күні облыста жылдағыдай «Жас түлек-2016» фестивалі өткізіледі.

— Жыл сайын 17 маусым күні мектеп түлектерінің «Жас түлек» фестивалі өткізіледі. Биыл аталған шара Қазақстан Республикасының Тұңғыш Президенті атындағы саябақта ұйымдастырылады. Түлектерге мектеп бітіру жөніндегі аттестат салтанатты түрде табысталады. Одан соң қала, облыс мектептерінде мектеп бітіру кештері өткізіледі, — деді ол.

Естеріңізге сала кетейік, 5 маусым күні Ақтөбеде лаңкестер «Паллада», «Пантера» қару-жарақ дүкендері мен №6655 әскери бөліміне шабуыл жасаған болатын. Осыған байланысты Ақтөбеде террористік қауіптіліктің қызыл деңгейі белгіленді. Еліміздің басқа аумақтарында 40 тәулік бойына террористік қауіптіліктің сары деңгейі белгіленді. Осыған байланысты алдында кейбір бұқаралық ақпарат құралдары Ақтөбеде мектеп бітіру кештері өткізілмейді деп ақпарат таратқан.

Загрузка...