1-сыныпқа бала қабылдаудан бас тартқан мектеп директоры жұмысынан босады

116 просмотров

Алматы облысы Қарғалы ауылындағы мектеп директоры бірінші сыныпқа бала қабылдаудан бас тартқаны үшін өз қызметінен босатылды.

Айта кетейік, Білім күніне дейін Алматы облысы Жамбыл ауданындағы үш тілде оқытатын №2 дарынды балаларға арналған Қарғалы арнайы мамандандырылған гимназиясы жазғы уақытта тест тапсырып, 1-сыныпқа алынған балаларды қабылдамай қойған. Мектеп басшылығы мұны оқушылар санының нормадан асып кетуімен түсіндірген.

Бұл туралы ҚазАқпарат хабарлады.

Алматы облысы білім беру басқармасының басшысы Ләззат Базарқұлованың хабарлауынша, биылғы тамыз айының басында облыстық білім беру басқармасы 1-сыныпқа баратын балалар туралы болжам ақпараттарды түзген. Гимназия директоры Ж.Құралбаева берген ресми ақпарат бойынша, Қарғалы ауылындағы мектепке қаржыландыру жоспарына сәйкес, екі толық сынып, яғни 54 бала қабылдау жоспарланған.

«Ал гимназия директоры Құралбаева білім беру басқармасына ескертпей, жоспарланған екі сыныптың орнына бес толық сынып, яғни 134 бала қабылдаған. БАҚ-қа жарияланған мәселе осыдан туындаған», — деді Ләззат Базарқұлова.

Алматы облысы білім беру басқармасының мәліметтері бойынша, бүгінде гимназияда 55 баладан 2 сынып жасақталған. Қалған 79 бала өзге мектептерге — №3 және №4 орта мектептер, Бейсеуов, Әпсеметов, Құтпанбетұлы, Қарсақбаев, Рысқұлов, Үмбетәлі және Уәлиханов атындағы орта мектептерге ауыстырылып, оқу жылын бастап кетті.

«Үш тілде оқытатын №2 дарынды балаларға арналған Қарғалы арнайы мамандандырылған гимназиясының директоры Құралбаева өз қызметінен босатылды», — деп хабарлады Алматы облысы білім беру басқармасының басшысы.

Загрузка...