Атырауда былтыр көршісі зорлап, кейін жауыздықпен өлтірілген 8 жасар Айкөркем Алдамжардың ата-анасы сөзінде тұрмаған жергілікті басшыларға өкпелі.
Бұл туралы КТК арнасы хабарлайды.
Айкөркем мен оны азаптап өлтірген көршісі Арман Рсалиевтің отбасы әлі күнге дейін бір ауылда, бір көшеде, тіпті бір шатырдың астында тұрып жатыр. Қан жұтып отырған ата-ананың айтуынша, қанішердің отбасын былтыр ауылдастары ауылдан күштеп көшіріп жібермек болғанымен, тәртіп сақшылары мұның заңсыз екенін айтып, тоқтатқан көрінеді.
“Үш үйді қарастырып алып келіңдер, бағасын сұрағанда 10 мен 15 миллион деп айтты. Онымен біздер өзіміз іздедік, өзіміз таптық, фотоларын апардық, солардың біреуінің берілетінін айтты. Содан бері хабар жоқ, айтуын айтып алды да сол кездегі қала әкімі Серік Шапкенов мырза, біздерді ұмытып кетті”,дейді Айкөркем Алдамжардың анасы.
Айкөркемнің ата-анасы жұмысбасты шенеуніктердің уәдесін естеріне салмақ болып, бірнеше рет хат та жазыпты. Бірақ келген жауап көңілдерінен шықпады. Ауыл әкімдігінің есігін де күнде қағып, енді жақсы жаңалықтан үміт үзген. Мұндағылардың айтары да Алдамжар отбасын әзір қуантпайтын да секілді.
Сотта немересінің қазасына қатысты Олжас Сүлейменовтің хаты оқылды (видео)
“Бұл жанұяға отбасында болып жатқан қиындықтарға байланысты әкімдік пәтер алып беруге демеушілікпен көмектесеміз деп айттық. Қазіргі уақытта демеушіліктердің реті болмауына байланысты әлі бұл жұмыстарды орындай алмай отырмыз. Алдағы уақытта қолымыздан келгенше көмектесуге жұмыстар жасаймыз”, деді Қайыршақты ауылдық аймағының әкімі.
Еске сала кетейік, 8 жасар Айкөркем Алдамжар былтыр маусым айында мектеп жанынан ашылған лагерге кетіп сол күй оралмады. Оның денесі арада 5 күн өткенде Жайық өзенінен табылған еді. Кейін жеткіншекті 24 жастағы көршісінің әуелі зорлап, кейін суға тұншықтырып өлтіргені белгілі болды. Қылмыскер өткен жылы 25 жылға бас бостандығынан айырылған болатын.