Италия футболшылары соңғы 60 жылдан бері тұңғыш рет әлем чемпионатының финалдық бөлігінен тыс қалды.
Жолдама үшін Швециямен тікелей таласқан Италия алғашқы ойында қарсыласына 0:1 есебімен жол беріп, қарымта кездесуде 0:0 есебімен тең түсті.
Сол ойынға қатысқан Италияның атақты ардагер қақпашысы Джанлуиджи Буффон көзіне жас алып тұрып, осымен ұлттық құрамадағы карьерасын аяқтайтынын айтты.
“Италия құрамасының әлем чемпионатына шыға алмағаны өте өкінішті. Бұл менің өмірімдегі жалғыз өкінішім. Оның жанында спорттық қарьерамды аяқтауым өкініш емес, өйткені менің жасым келді“, – деді қақпашы.
39 жастағы Буффон Италия құрамасы сапында алғаш рет 1997 жылы алаңға шықты. Ұлттық құрама сапында 174 матч өткізіп, 2006 жылы әлем чемпионы, 2012 жылы Европаның вице-чемпионы атанған. Ресейдегі әлем чемпионаты оның алтыншы мундиалі болар еді, бірақ бұл бақыт оның маңдайына жазылмапты.
Ресейге барған жағдайда ол алты әлем чемпионатына қатысқан тарихтағы жалғыз футболшы болар еді.
Буффонмен бірге құрамадағы карьерасын жартылай қорғаушы Даниэль Де Росси мен қорғаушылар Андреа Барцальи, Джорджо Кьеллини де аяқтамақ.
https://youtu.be/aYLwUnKm7hc