Жетісу облысында аттың жалына байлап өлтірген әйел ісі: туыстары жаңа деректерді жария етті
Жетісу облысы Ақсу ауданы Баласаз ауылында 32 жастағы Айзат Жұманованы өлтірді деген күдікпен күйеуі қамауға алынды. Туыстарының айтуынша, ер адам әйелін бірнеше сағат бойы азаптап, кейін атқа байлап сүйреп өлтірген.
Марқұмның денесі ауыр жарақаттанған: бас сүйегі мен жамбас сүйектері сынған, қол-аяғының терісі сыпырылып, миына зақым келген. Туыстарының айтуынша, Айзаттың денесі ауруханаға түскенше жуылып, киімі ауыстырылып, қан іздері тазаланған. Әйел Талдықорғандағы ауруханаға 22 маусым түнгі 02:30 шамасында жеткізілгенде қайтыс болып кеткен.
Қайғылы оқиғаға куә болған 2 жасар бала ауыр психологиялық соққы алған, қазір сөйлемей қалған, қараңғыдан қорқады, анасын іздейді.
Қазіргі кезде іс Қылмыстық кодекстің 106-бабы 3-бөлігі – «Денсаулыққа қасақана ауыр зиян келтіріп, абайсызда адам өліміне соқтыру» бойынша тергеліп жатыр. Алайда марқұмның туыстары бұл бапты «Ерекше қатыгездікпен кісі өлтіру» деп өзгертуді талап етеді.
Облыстық полиция оқиғаның барлық жай-жапсары жан-жақты тексеріліп жатқанын хабарлады. Дәлелдер жиналып, сараптамалар жүргізілуде. Кінәлі адам заңға сәйкес жауапқа тартылатыны айтылды.
Айзаттың артында екі жасар қызы қалды. Күдікті бұрын Қапал ауылының әкімдігіне сайлауға түспек болғаны да белгілі болды. Марқұмның туыстары әділ тергеу жүргізіліп, қылмыскердің тиісті жазасын алуын талап етуде.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе