Жеті айлық сәбиін еденге атып ұрған келіншек баласынан айырмауды өтініп, зар жылады

Бұл туралы КТК телеарнасы хабарлады.

Десе де, Тюменцеваға ешкім де жаны ашитын сыңай танытпады. Тіпті, әйелді қолдап сотына адвокатынан басқа ешкім келмеген. Ал атышулы бейнероликтің авторы – азаматтық некедегі күйеуі болса, жанжалдан кейін бала-шағасы мен әйелін тастап, тайып тұрыпты. Енді прокурор бастаған қамқорлық бөлімінің қызметкері мен полицейлерден құралған топ оны ата-ана құқынан айыруды сұрап отыр. Одан қалды, кәмелетке толмаған сәбиге күш көрсеткені үшін үш жылға абақтыға қамауды өтінді. Мұны естіген Тюменцева сот отырысынан ботадай боздап шықты.

“Мені түрмеге жабу үшін бәрін істеп жатыр! Қазір балаларыма жақсы қараймын. Дұрыс жолға түстім. Арақты тастадым, енді аузыма да алмаймын. Дәмханаға жұмысқа тұрдым. Әрине, алатын жалақым аздау, бірақ балаларым үшін адал еңбек етіп жатырмын.Сот алқасынан қолдау көрсетуін сұраймын, маған кешіріммен қарап, қыздарымды өзіме қалдырса деп тілеймін”, – деді ол сотта.

Тюменцеваның айтуынша, содан бері сәбиіне саусақ ұшын да тигізбепті. Керісінше, арақты біржола қойып, жергілікті дәмханалардың бірінде ыдыс жуушы боп жұмысқа тұрған. Тапқан табысын тек бала-шағасына ғана жаратып жатыр екен. Айтқандай-ақ, үш ай бұрын аузынан арақ иісі аңқыған әйел оңалуға барынша тырысып-ақ жатқан сыңайлы. Бір ай бұрын таяқ жеген кішкентай Ираданың да әжептеуір өңі кіріп, анасының айналып- толғанғанына мәз-мейрам көңілде. Араққа салынған келіншекті туған әпкесі қамқорлығына алыпты. Айтуынша, Маринаның отбасылық қиын жағдайын бұлар о баста білген. Бірақ, күйеуінің тентек мінезінен араласуға батпапты.

“Маринаға мүмкіндік беру керек деп есептеймін. Рас, ол қателік жіберді. Бірақ, адаспайтын адам жоқ қой. Ең бастысы әпкем арақты қойды. Жұмысқа орналасты. Ол жұмыста болғанда қыздарға мен бас-көз боп отырмын. Қыздары анасын қатты жақсы көреді, жұмыстан келгенде алдынан жүгіріп шығады”, – деді Марина Тюменцеваның жиені Кристина Тюменцева.

Ал жантүршігерлік әрекетке баруына бірге тұрған жігіті себепші болыпты. Сол күні үйінде қырық пышақ ұрыс болып, соңы осындай жағдайға душар еткен. Тюменцева күйеуінің жиі сілтенетін жұдырығынан жүйкесінің тозғанын айтады. Сондай ұрыстардың бірінде, жолдасы бетін тіліп, ал үлкен қызының басын жарып тастаған екен. Онда да аса қатігездік танытқан деген баппен іс қозғалған. Тіпті, тергеушілер жарақаттарын суретке де түсіріп алыпты. Бірақ, қылмыстық істің соңы сұйылып, ақыры ың-шыңсыз жабылып тынған. Тұрмыстық жанжалдың құрбаны болдым деген келіншек өзіне соңғы мүмкіндік беруін сұрап отыр. Нақты сот үкімі ертең белгілі болмақ