Қазақстанда техникалық ақауы бар автокөліктердің иелері енді ақша бере салып «техосмотрдан» өте алмайды, деп қорқытады Инвестиция және даму министрлігінің көлік комитеті.
Ішкі істер министрлігі техникалық байқаудан өткізу функциясын жекеменшіктің қолына бергелі «техосмотрдың» қағазы оңды-солды сатылатын болып кетті. Енді сондай орталықтардың жұмысын тәртіпке салу үшін компьютерлік бағдарлама жағынан үлкен өзгеріс енгізгелі отыр екен.
Диагностикалық стендтердің көрсеткіштерін дерек базасына жіберу жүйесіне өзгеріс еніпті. Операторлар енді бұл іске баяғыдай араласа алмайды.
– Бұрын техникалық тексеру орталықтары кез-келген компьютерлік бағдарламаларды пайдаланылып келген. Бастысы – стендтерден түскен деректер міндетті техникалық байқаудың Бірыңғай ақпараттық жүйесіне жетсе болды.
Бірақ операторлар сол деректерді өз бетінше өзгертіп, жүруге жарамсыз автокөліктерді «жарамды» ете беретін.
Осылайша жемқорлардың айы оңынан туып, оларға көл-көсір ақшаға кенелді. Ал Қазақстан жолдарында апатты жағдайдағы көліктер емін-еркін жүре берген, – деді ҚР Инвестиция және даму министрлігі Көлік комитетінің автокөлікті бақылау басқармасының өкілдері.
Техникалық байқау орталықтарында деректерді өзгертуге мүмкіндік бермейтін алты бағдармала бар екен: 4 ресейлік және 2 қазақстандық. Енді операторлар тек сол бағдарламаларды ғана пайдалануы тиіс.
Өзге бағдарлама пайдаланғандарға ірі айыппұл салынады.