Елімізде ескі көліктерді утилизациялау қарқынды жүріп жатыр. Екі апта бұрын басталған жобаға 900-ден астам өтініш түсіп, ескі-құсқы машинаны өткізген азаматтарға 40 миллион теңге берілген.
Бұл туралы КТК хабарлайды.
Жылдар бойы базар аралап ескі көлігін мардымсыз ақшаға сатуға қимағандар утилизациялауға қуана келіскен екен. Бірақ олардың басымы 30-40 жыл бұрын шығып, әбден ескіріп жүруге жарамсыз болып қалғандар. Ал одан беріректе шыққан шетелдік көліктердің иелері қазірше 150 мың теңгені аздық етуде.
Жандос Сұраншиев:
– Бұндай ескі машинаны қазір ешкім алмайды ғой. Бірақ жүріп тұрған көлік. Есігі дұрыс жабылмайды, тағысы-тағы басқа дегендей. Содан кейін экология жағынан жүргізбейді,полицейлер. Амал жоқ болғаннан кейін утилизацияға келіп отырмыз. Жоқ дегенде, 150 мың теңге алсақ та.
Мұндай көліктерді қабылдау екі санат бойынша жүзеге асырылуда. 150 мың теңге алу үшін көліктің қозғалтқышы, есіктері, шанақ, капот, жүксалғыш қақпағы, радиатор мен аккумулятор және 4 дөңгелегі түгел болса жеткілікті. Ал онысы жоқтары 48 мың теңгеге ғана бағаланады. Сондай-ақ утилизациялауға апатты автомобильдер де қабылданады. Ал мүгедектер мен зейнеткерлерге мобильді топ үйіне барып, құжат рәсімдеуге көмектесуге әзір.
Бексейіт Боранбаев, «Оператор РОП» ЖШС менеджері:
–Көліктерді өткізу үшін автокөлікті тіркеуден шығару керек. Екіншісі банктен есепшот ашу керек. Сол екі қағаз бен жеке куәлігімен мобильді пунктқа келу қажет.
Утилизациялау еліміздегі автопаркті жаңарту мақсатында қолға алынған. Себебі, 3 млн көліктің зауыттан шыққанына 10 жылдан асса, 1,5 милионы мүлдем мінуге жарамсыз. Осылайша, небәрі екі апта ішінде ел бойынша 900-ден астам көлік қабылданып, жүргізушілердің есеп-шотына шамамен 40 млн теңге аударылған. Мобильді топтар енді Оңтүстік Қазақстан, Павлодар және Қарағанды облыстарындағы ауылдарды аралап шықпақ.
Жұмыс осындай қарқынмен жалғасса утилизация бағдарламасы бойынша жыл соңына дейін 10 мың жеңіл көлікті қабылдау жоспарланып отыр. 2017 жылдан бастап автобустар мен жүк көліктерін де өткізуге мүмкіндік болады. Ал тұрғындар тозығы жеткен темір тұлпарларын өткізу арқылы су жаңа отандық автомобильді сатып алуға 315 мың теңгелік жеңілдікке қол жеткізе алады.