Қазақстан Республикасының Бас Прокуроры Түркия Республикасының Жоғарғы сотының төрағасы және Бас Прокурорымен кездесті, деп хабарлайды Бас прокуратураның баспасөз қызметі.
Түрік әріптестерін қарсы ала отырып, Ж.Асанов құқықтық саладағы екі жақты қатынастың достық және сындарлы сипатта екендігін атап өтті.
Сұхбат барысында Қазақстанның Бас Прокуроры түрік тарапына Қазақстан прокуратура органдары қызметінің негізгі бағыттары, сонымен бірге, шарттық-құқықтық базаны күшейту және кеңейту бойынша атқарылып жатқан жұмыс туралы ақпарат берді.
Сұхбаттасушылар өзара қызығушылық танытатын мәселелерді талқылады, сонымен қатар, халықаралық күн тәртібіндегі өзекті проблемалар бойынша пікір алмасты.
Түркия Жоғарғы сотының төрағасы Исмаил Рюштю Джирит және осы елдің Бас Прокуроры Мехмет Акарджа Қазақстан Республикасы Бас прокуратурасының Құқық қорғау қызметі орталығы және жоба кеңсесінің жұмысымен танысып, жоғары баға берді. Оларға Елімізде цифрлық технологияны дамыту бойынша Елбасы Жолдауы аясында Бас прокуратура Комитеті тарапынан жүзеге асырылып жатқан бірқатар жобалар көрсетілді.
Кездесу соңында Жақып Асанов түрік тарапына Қазақстанға сапары үшін алғысын білдіріп, құқықтық салада өзара қарым-қатынастың одан әрі дамуына ниет білдірді.