Жамбыл облысы Мерке ауданындағы ауыл тұрғындарының бірі үйінің алдынан бір жасар қызды тауып алды.
Бұл туралы Жамбыл облыстық ішкі істер департаментінің баспасөз қызметі хабарлады.
Баспасөз қызметіндегілердің мәліметінше, егде жастағы ерлі-зайыпты қызды 2017 жылдың 15-ақпанында тауып алған.
Қызды тауып алған әйелдің айтуынша, ол сол кезде сәбидің жылаған даусын естіп, аулаға шыққан. Бірақ ол баланы кімнің тастап кеткенін байқамаған. Сондай-ақ, қыздың қасында
“Оның аты – Зере. 1 жас 3 айлық қыз. Қызға бір ай қарап берсеңіздер, мен кейін оны алып кетем”
деген хат жатқан. Баланы тауып алған адамдар полиция шақырған.
Осы дерек ҚР Қылмыстық кодексінің 119-бабы бойынша (“Қауiптi жағдайда қалдыру”) бірыңғай тергеу реестріне тіркелді. Күдіктінің кінәсі дәлелденген жағдайда, ол 100 айлық есептік көрсеткіш ретінде айыппұл төлейді немесе сол көлемде түзету жұмыстарына тартылып не болмаса да 120 сағатқа дейін қоғамдық жұмысқа тартылып, сондай-ақ, 45 тәулікке қамауға алынуы мүмкін.