Қарағанды қаласындағы Серік Сәпиев атындағы Бокс орталығында LED-экраннан Геннадий Головкин мен Сауль Альварестің жекпе-жегін тікелей эфирден трансляциялауды ақылы түрде ұйымдастырушылар көрермендерге ақшасын кері қайтарып берді.
Ал шара тегін өткізілді, – деп хабарлайды ҚазАқпарат.
«Мұндай шешім Қарағанды қаласының Ішкі істер басқармасына «Qazaqstan» және «Qazsport» арналарынан шағым түскен соң қабылданды. Себебі жекпе-жекті ақылы түрде көрсетуге тек олардың ғана құқы бар», – деп атап өтті баспасөз қызметінен.
Еске салайық, қарағандылықтар өз жерлестерінің жекпе-жегін қаланың әр жерінде орнатылған үлкен LED-экрандардан тамашалай алады. Тікелей трансляциялар үш жерде – Кеншілер мәдениет сарайының алдындағы алаңда, Жаңа Майқұдық шағынауданындағы Мәдениет үйінің алдында және Достық үйінің алдында ұйымдастырылады.