Қытайдағы I Am a Singer телевизиялық музыкалық байқауға қатысып жатқан жерлесіміз Димаш Құдайбергенов өзін Витаспен салыстырмауды сұрады.
Ерекше дауысты әнші бұл туралы Instagram әлеуметтік желісіндегі ресми парақшасында жазды.
“Қайырлы кеш, достар! “Қазақтың Витасы”, “Витас сияқты айтады”, “Екінші Витас” деген теңеу сөздеріңізді естіп жатамын! Әрине, Витас жақсы әнші, оны құрметтеймін, бірақ мен “Екінші Витас” емеспін! Музыкадан xабары бар мамандар мені жақсы түсінеді!..”, – деп жазды әнші.
“Қалай болатынын бағалай жатарсыздар! Айтпақшы, келесі байқау 28 қаңтар күні Бейжің уақытымен 22:05-те! Hunan tv online арқылы тамашалай аласыздар!”, – деді әнші.
Димаш Құдайберген телешоудың І-кезеңінде алғашқы болып сахнаға шығып, SOS d’un terrien en détresse әнін француз тілінде орындап, жарқ еткен еді. Ол осы кезеңнің үздігі атанды. Енді алда әлі 13 кезең бар. Конкурс Қытайдың Чанша қаласында өтіп жатыр. Менеджерінің айтуынша, Димаш Құдайберген осы конкурсқа қатысу үшін имиджін өзгерткен.
I Am a Singer конкурсының биылғы маусымы Қытайдың рейтингі ең жоғары – Hunan TV телеарнасынан беріліп жатыр.