Елімізде ет бағасы қымбаттап, базарда бір келісі 2300 теңгеден сатылуы мүмкін. Қытайға ет экспорты басталса, баға өседі деген ақпаратты бүгін Ауыл шаруашылығы министрлігі де растады. Ал Үкімет ең өтімді сиыр етін еліміздің 9 облысынан Қытайға 50 мың тоннадан сатуды жоспарлап жатыр.
Бұл туралы 31 арна хабарлайды.
– Өткен жылы қыркүйек айында Қытайға аттарды экспорттауға рұқсат алған болатынбыз. Кеше балды экспорттауға да рұқсат алдық. Енді жылдың соңына дейін қытай базарына сиыр етін тасымалдауды жоспарлап отырмыз,- деді Ауыл шаруашылық министрінің бірінші орынбасары Қайрат Айтуғанов.
Ал, бір келі еттің бағасы өзгеретіні жайлы ауыл шаруашылығы вице-министрі Төлеутай Рақымбеков былай деді:
– Жеті доллар деген ақпаратты мен де естідім. Ол ішкі нарықтағы, бөлшек саудадағы баға болуы мүмкін. Ондай көтеріңкі баға болса, тауар өндірушілер қуанады.
Бағаның қымбаттайтынына шаруа қожалықтары қуанғанымен, сатушылар қуанып тұрған жоқ. Қазірдің өзінде базарда қымбатшылық, малдың құны аспандап тұр. Ал, экспортқа шығарсақ ішкі нарықта жетіспеушілік болып, еттің бағасы одан да шарықтап кетеді деп қауіптенеді.
Бәтес Ерболат