Тұрлыхановтың ұлы бас бостандығы шектелсе де, түнгі уақытта көшеде жүр

Желіде мәжіліс депутаты Дәулет Тұрлыхановтың бас бостандығы шектелген ұлы Нұрасыл Болаттың түнгі уақытта көшеде жүрген бейнесі тарады. 

Мәжіліс депутаты Дәулет Тұрлыхановтың ұлы Нұрасыл Болат ерлі-зайыпты заңгерлер Черновтарға шабуыл жасағаны үшін 2 жылға бас бостандығын шектеу жазасына кесілді. Алайда бейнеде оның талапты орындамай жүргені байқалады. Нұрасыл Болат түнде көшеде темекі шегіп тұр және автордың сөзіне жауап қатпайды.

«Бейне шамамен түнгі сағат 3-те жарияланды, ал ол кешкі 23.00-ден кейін үйде болуы керек. Оның үстіне оның тіркелген жері – Астана, бірақ видео түнде Алматыда түсірілген. Бұл жерде бірнеше құқықбұзушылық орын алып отыр», – деп мәлімдеді адвокат Анна Чернова.

Айта кетейік, ақпан айында заңгер Анна Димитриевич күйеуі Олег Чернов екеуін Дәулет Тұрлыхановтың ұлы Нұрасыл соққыға жыққанын мәлімдеді. Көп ұзамай оның үстінен ҚР ҚК-ның 293-бабы «Бұзақылық» бойынша қылмыстық іс қозғалды.