Нұр-Сұлтан
Қазір
2
Ертең
-4
USD
431
0.00
EUR
516
0.00
RUB
5.68
0.00

Туберкулезге қатысты жанжал: Бәріне лаборант-рентгенолог кінәлі болып шықты

“Қазанның 18-і күні өзін жайсыз сезініп, ауруханаға түседі. Тек, қазанның 27-сі күні ғана оған осындай диагноз қойылғанын естідік. Алдында анасы тексеруден өтіп жатыр деген. Білікті, білімді ұстаз болатын. Бірақ, аруына қатысты біз ештеңе білмедік. Екі жыл болды бізде қызмет атқарып келе жатқанына”, – дейді Юрий Гагарин атындағы №8 арнаулы гимназиясының директоры Гүлмария Ошақбаева.

Мектептегі төтенше оқиға аудан халқын аяғынан тік тұрғызып, баласына алаңдаған ата-аналарды әрі-сәрі күйге түсіреді. Абырой болғанда, науқасқа туберкулездің жабық түрі деген диагноз қойылады.

Мыңнан астам оқушысы бар мектепте абыр-сабыр басылғанымен, көпшіліктің көңілі әлі де күпті.  Түрлі жиналыстар өткізіліп, ата-аналарға түсіндіру жұмыстары жүргізіліпті. Қауіпті дертті жұқтырған мұғалімнің кабинеті мен мектеп іші толықтай дезинфекцияланған. Қазір ол сабақ берген бірінші сыныптың 22 оқушысын дәрігерлер түгелдей тексеріп жатыр. Сондай-ақ, директордың айтуынша, ұжымдағы 80 мұғалім де қайтадан тексеруден өтеді.

Директордың дерегінше, қол астындағы қызметкер оқу жылы басталар кезде толықтай медициналық бақылаудан өтіпті. Тексере келе бар қателік өкпесі таза деп анықтама берген жекеменшік медициналық орталықтан кеткені белгілі болады.

“Бізде лаборант-рентгенолог қызметін атқаратын жігіт қателесіп, бәрі дұрыс деген мөр басып берген. Бәлкім, халық қарасы көп болғасын аңғармай қалған шығар. Бірақ, оның алдында дәрігер-рентгенолог ауытқу барын, қосымша тексеру керектігін жазып берген. Егер арам ойымыз болса, рентген суретін санитарлық кітапшаға тіркеп бермес еді. Ұқыптылықпен қарап рентгенолог-дәрігердің жазғанын оқыса, мұндай болмас еді. Бірден мөр баса салған. Мен өзімнен және қызметкерлерден жауапкершілікті алып тастайын деп тұрған жоқпын. Ол медициналық мекеменің абыройына нұқсан келтіреді. “, – дейді «Талмед» ЖШС медициналық орталығының директоры Бауыржан Сүлейменов.

Клиника басшысының айтуынша, өз ісіне салғырттық танытып, ағаттық жіберген лаборант мектептегі жанжалға дейін қызметінен кетіп қалыпты. Бірақ, оңды-солды анықтама таратпаймыз, бармақ басты, көз қысты әрекет жоқ деп, бет қаратпады. Дегенмен,  елді дүрліктірген орталыққа қандай да бір шара қолдана ма, әлде жоқ па, о жағы әзірге белгісіз. Ал, өкпе дерті алып ұрған ұстаз қазір Алматы қаласындағы аурухананың жансақтау бөлімінде жатқан көрінеді.

Серіктестер жаңалықтары
Көп қаралған
© «365 Info», 2014–2021 info@365info.kz, +7 (727) 350-61-36
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе
Қате байқасаңыз, оны белгілеп Ctrl+Enter басыңыз