ҚР Ішкі істер министрлігі Мұратхан Тоқмәдидің сенсациялық мәлімдемесіне байланысты арнайы тексеру жұмыстарын жүргізетін болады.
Бұл жайында ҚР ІІМ Мемлекеттік тіл және ақпарат департаментінің директоры Алмас Садубаев айтты, деп хабарлайды ҚазАқпарат.
«Бұған дейін Мұратхан Тоқмәди аталған факті бойынша Ішкі істер министрлігіне жүгінген емес. Ержан Артықбаев 2010 жылы ІІМ Тергеу комитетінің Әскери-тергеу басқармасы бөлімінің бастығы лауазымында зейнетке шығып, ішкі істер органдарынан босатылды. Ағымдағы жылдың 24 қазанындағы М.Тоқмәдидің БАҚ-тағы мәлімдемесіне орай ІІМ Өзіндік қауіпсіздік департаменті өзге де құқық қорғау органдарымен өзара іс-қимыл жасай отырып, сәйкесінше тексеру жүргізетін болады», – деді Алмас Садубаев.