Теміртауда жеті студент пышақ жарақатымен ауруханаға түсті
Теміртауда техникалық колледжінің аумағында жаппай төбелес болып, жеті студент ауруханаға жеткізілді.
Бұл туралы BNews.kz хабарлады.
Дәрігерлердің айтуынша, пышақ жарақатын алған жеті жігіт ауруханаға 17 қыркүйек күні кешке түскен. Олардың үшеуі медициналық көмектен кейін үйлеріне қайтты. Төртеуі ауруханаға жатқызылды.
«Жаппай төбелес салдарынан жеті адам түрлі жарақатпен ауруханаға түсті. Төртеуін жатқыздық, үшеуі хирургия, біреуі жансақтау бөлімінде жатыр. Абырой болғанда, ішкі органдарына зақым келмеген. Барлығының жағдайы орташа. Жансақтауға түскен жігітке ота жасалды, қазір өміріне қауіп төніп тұрған жоқ. Студенттер аурухана қабырғасында ең кемі бір апта болады», – дейді Теміртау ауруханасы ауруларды қабылдау бөлмесінің меңгерушісі Данияр Көжебаев.
«Бұзақылық фактісіне қатысты ҚР Қылмыстық кодексінің 293-бабы 3-тармағы бойынша сотқа дейінгі тергеу басталды. Оқиғаның жай-жапсары анықталу үстінде. Криминалды полиция қызметкерлері екі азаматты ұстады, қазір олар уақытша ұстау абақтысында. Сондай-ақ тағы бірнеше адам полиция бөлімшесіне жеткізілді. Алдын ала мәліметтерге сүйенсек, жастар қыз үшін жаға жыртысқан», – дейді Қарағанды облысы Ішкі істер департаменті баспасөз қызметінің жетекшісі Бақытжан Құдияров.
Болжам бойынша, студенттер арасындағы төбелес қыз үшін басталған. Әзірге, оқу мекемесінің ұстаздары бұл жайтқа қатысты түсініктеме бермей отыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе