«Таза Қазақстан»: Қарағанды облысында көгалдандыру жұмыстары қарқын алды
Қарағанды облысында «Таза Қазақстан» экологиялық акциясы аясында көгалдандыру шаралары белсенді түрде жалғасып жатыр. Шахтинск қаласында табиғатты сүйетін тұрғындардың бастамасымен жаңа «жасыл белдеу» пайда болды. Ағаш отырғызу жұмысына ересектер де, балалар да белсенді қатысты. Жеңістің 40 жылдығы көшесінде 300 қарағаш пен қарағай көшеті отырғызылды.
Экологиялық сенбіліктің ең жас қатысушысы Толғанай кейбір ағаштарға ерекше атау беруді ұсынды. Іс-шараға облыс әкімі Ермағанбет Бөлекпаев та қатысып, қала тұрғындарына қаланы көгалдандыруға қосқан үлестері үшін алғыс айтты.
– Бүгін республика бойынша сенбілік өтуде. Шахтинск тұрғындары да тазалық жұмыстарына белсене атсалысуда. Сонымен бірге ағаш отырғызу жалғасуда. «Таза Қазақстан» акциясы — халық қолдауына ие тамаша бастама, – деді аймақ басшысы.
Көгалдандыру үшін аймақтың климаттық ерекшеліктеріне сай ағаш түрлері таңдалған. Отырғызылған жасыл желектер тұрақты күтімге алынады.
– Бүгін біз қарағай мен кәдімгі қарағаш көшеттерін отырғызуды жалғастырудамыз. Бұл көшеттер Қарағанды тәлімбағынан әкелінді және өте жақсы жерсінеді. Өткен жылы Жеңістің 40 жылдығы көшесінде абаттандыру жұмыстары жүргізіліп, тротуар төселген болатын, енді биыл ағаш егудеміз, – деді Шахтинск қаласы әкімінің орынбасары Арман Саттыбаев.
Толғанай сенбілікке ата-анасымен бірге келіп, алғашқы ағашы – жас теректі отырғызды. Ол ағашына «Үміт» деген ат қойып, оны күтіп-баптауға уәде берді. Толғанайдың бастамасын басқа қатысушылар да қолдап, өз көшеттеріне атау бере бастады.
Көктемгі екі айлық ішінде Шахтинск аймағында 1700-ден астам ағаш отырғызылып, 300 гектар аумақ тазартылып, 400 тоннадан астам қоқыс шығарылды. Экологиялық сенбіліктер облыстың басқа қалаларында да өтті.
Қарағанды қаласында Абай көшесіндегі саябақ көгалдандырылып, бір күнде 500-ден астам ағаш пен бұта — қарағаш, қарағай, шегіршін, мамыргүл және қараған отырғызылды.
Экобелсенділердің бастамасымен жаңа емхана жанындағы Көгілдір тоғандар саябағында да көгалдандыру жұмыстары жүргізілді. Сонымен қатар, ресурс үнемдейтін технологияларды қолдана отырып, өсімдіктерді күтуге арналған шеберлік сабағы өткізілді.
– Әр отырғызылған ағаш — балаларымыздың жарқын болашағына қосылған үлес. Мұндай іс-шаралар табиғатты аялау мәдениетін қалыптастырады. Біз тек бірлесе әрекет ету арқылы экологиялық жағдайды жақсарта аламыз, – деді «ЭкоОбраз» қоғамдық бірлестігінің директоры Светлана Былинская.
Теміртау қаласында да «Таза Қазақстан» акциясын қолдау мақсатында Қарағанды индустриалды университетінің қызметкерлері мен оқытушылары оқу орны аумағына қайың ағаштарын отырғызды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе