Шымкентте Ёська атты лақап атымен танымал қылмыс әлемінің серкесі Жүсіпбек Бартікеев 13 жылға сотталды.
46 жастағы сотталушы өзінің екі сыбайласымен бірнеше қылмысқа қатысты деп күдікке алынған. Оның ішінде ақпарат алу үшін арнайы құралды заңсыз пайдалану сынды бап та бар деп хабарлады TVK телеарнасы.
«Тексеру кезінде оның пәтерінен арнайы тыңдау құралдары табылған. Ал ондай құралды иемдену үшін арнайы лицензия болу керек. Ал оның лицензиясы болмаған. Ол күзет қызметінің бастығы болғандықтан оны белгісіз біреуден сатып алғанын айтты»,- дейді судья Дәурен Мадалиев.
«Екі кәсіпкер бірігіп, бизнес жүргізбек болады. Бірақ ашқан кәсіптерінің тасы өрге жүрмей, банкротқа ұшырайды, ал ортақ қарыздары сол күйі қалады. Екеуі қарызды төлеуді бір-біріне сілтейді. Ақыры біреуі қашып кетеді. Оны ұстау үшін екінші кәсіпкер кісі жалдайды. Сол кезде қашқан кәсіпкер қылмыс әлемінің серкесінің көмегіне жүгіну үшін алдына келеді,- дейді судья.
Қылмыстық іс 15 томнан тұрады. Сот Бартікеевті 13 жылға бас бостандығынан айырды, ал оның екі сыбайласы – Серік Жапашев 11 жылға, ал Мұхамеджан Орманов 6 жыл 8 айға сотталды. Алайда айыпталушы тараптың туған-тусытары сот үкімімен келіспеді.
«Бұл жігіттердің кінәсі не? Оларды бопсалады деп айыптайды, оған дәлел жоқ қой, керісінше олар дүрдараз екі кәсіпкерді татуластырмақ болды. Ал оларға өте қатаң жаза кесті, артында қараусыз бала-шағасы қалып барады»,- деді Ормановтың атасы Оспанәлі Орманов.