Шымкентте елден 300 миллион теңгені алдап, жинап алып, қашып жүрген азамат ұсталды. 46 жастағы адам тендер алып беремін деген желеумен жәбірленушілердің ақшаларын алып кетіп отырған.
Бұл туралы облыстық ІІД баспасөз қызметі хабарлады. Бұған дейін бұл адамға іздеу жарияланған екен. Оны Әл-Фараби аудандық полиция бөлімінің қызметкерлері қолға түсірді.
„Ол 5 алаяқтық әрекетке қатысы бар болғаны үшін істі болып, артынан кепілге босатылған. Алайда ол соттың шешімін күтпей, ізін суытқан. Арада жарты жыл өткенде жедел іздестіру іс-шараларын жүргізу кезінде тәртіп сақшылары күдіктіні өз үйінде ұстап, полиция бөліміне жеткізді.
Тергеуде анықталғаны 46 жастағы сезікті 2015 жылы 32 жастағы Шымкент қаласының тұрғынының сеніміне кіріп, тендер алуға көмектеспекші болған. Сөйтіп, ол оның 120 миллион теңгеден астам ақшасын алып ізін суытқан. Осылайша алаяқ басқаларды да алдаған. Жәбірленушілерге оның бас-аяғы 300 миллион теңгеге жуық шығын келтіргені анықталып отыр. Қазіргі таңда оның үстінен Қылмыстық кодекстің 190-шы бабы, «Алаяқтық» әрекеті бойынша іс қозғалып, тергеу амалдары жүргізілуде. Күдікті уақытша тергеу абақтысына қамалды„ делінеді алдын ала таратылған хабарламада.
Шымкент қалалық ішкі істер басқармасының Әл-Фараби аудандық полиция бөлімінің қызметкерлері күдікті 1971 жылы туған Сағын Сейітжанның әрекеттерінен зардап шеккен азаматтардан «102» нөміріне хабарласуды сұрайды.