Шымкент мамандары ауыр хәлде жатқан науқасқа дәрігер жіберуге тағы да тапсырыс берген

“Бұл қалыпты үрдіс болып есептеледі. Бізді аудандарға шақыртатыны секілді біз де  қажет болған жағдайда республикадан білікті дәрігерлердің көмегіне жүгінеміз. Бірақ дәл біздің шақыртуымызға шығып, қайғылы жағдайға ұшырағанына қатты қынжылып отырмыз. Олардың өліміне себепкер болғандаймыз”, – дейді облыстық клиникалық аурухананың жансақтау бөлімі  меңгерушісі Вячеслав Цай.

Шымкенттік дәрігерлер қазір науқастың өмірі үшін күресуде. Ол жасанды демалдыру аппаратының көмегімен тыныс алып жатыр. Мамандар республикадан екінші рет білікті дәрігерлерді шақыртуға тапсырыс жіберіпті. Алайда, Қазақстанның санитарлық авиация орталығы қайтадан ұшақ жіберілмейтінін мәлімдеді.

Министрлік таратқан ақпаратқа сай, бұған аса қажеттілік жоқ көрінеді. Дәрігерлер телемедициналық кеңестен соң өзара осындай қорытындыға келген. Ал профессор Талғат Патсаевтың мәйіті туған жері Шымкентке жеткізіліп, сол жақта жер қойнына тапсырылмақ.