Шығыс Қазақстан облысындағы елді мекеннің іргесіндегі Үлбі өзені жағаға тақау үйлердің бау-бақшасына жайылған.
Бұл туралы Хабар 24 хабарлайды.
Ал көктемде судың деңгейі 5-6 метрге дейін көтеріледі. Соңғы үш жылда өзеннің арнасы кеңіп, ауылға тіптен жақындап келеді. Қазір толқын көтерілген сайын тұрғындарды үрей билейді. Жергілікті атқарушы билік пен төтенше жағдайлар қызметі жағаны бекітудің жобасын енді жасап жатыр.
«Бұдан 28 жыл бұрын ауылды түгел су шайып кеткен. Ол кезде өзеннің жағасы ауылдан алыс әрі берік болатын. Ал алдағы көктемде жағдай қалай болатынын елестеудің өзі қорқынышты. Өйткені өзеннің арнасы мүлде бұзылып кетті. Жаға деген атымен жоқ», – дейді Тархан ауылының тұрғыны Елена Ляпунова.
Қазір ауыл бойынша 40 тан аса үйге өзеннен қауіп төніп тұр. Кейбір үйлердің ауласындағы қоршауларын бұзып, бау-бақшасымен ағып жатыр.
Ауыл тұрғындары жергілікті әкімдікке қауіпке қарсы шара қолдануды өтінген. Бірақ жағаны бекітіп, тасқынға тосқын жасауда атқарушы биліктің сылбырлығана қынжылады.
« Мен осы жазда ауыл әкімдігіне барып, мәселені айттым. Комиссия келіп, жағада ары-бері жүрді де, «бұл негізі – күмәнді мәселе» деді. Қандай даулы және күмәнді мәселе болуы мүмкін. Дереу әрекет ету керек емес пе?!» – дейді Тархан ауылының тұрғыны Светлана Шульмина.
Ауыл әкімі әрекет ету үшін жоба-жоспар жасалып жатқанын жеткізді. 2012 жылы өзеннің 1 шақырымға жуық жағасы бекітілген. Келешекте осы жұмыстар жалғаспақ.
«Өзеннің жағасының топографиялық суреті жасалып жатыр. Ол дайын болған соң атқарылатын жұмыстың жобасы сызылып, жұмыс көлемі анықталады», – дейді Фрунзе ауылдық округінің әкімі Базарбек Жаңабаев.
Облыстық төтенше жағдай департаментінің мәлеметі бойынша, облыста 87 ауылға өзеннен қауіп тұр. Сондықтан 2020 жылға дейін жағаларды бекіту жұмыстары кезең-кезеңмен жүргізіледі.
«Биылғы жылы 13 елді мекенде жағаны бекіту жұмыстарын атқарамыз. Бұл ауылдар шамамен қазір 2,5 мыңға жуық адам тұрады. Әрине тасқын қаупі жоғары ауылдарды бірінші қолға аламыз», – дейді облыстық ТЖД бөлім басшысы Алексей Штыкель.
Облыста 2018 жылы тасқынға тосқын жасаудың жоспары мен бөлінетін қаржы енді қарастырылып жатыр. Алдын ала есептік болжам бойынша әрбір ауданнан аз дегенде 40 миллион теңге бөлінбек. Ал арнасы Тархан ауылына біртіндеп жақындап келе жатқан Үлбі өзенінің жағасы бекіту үшін қанша қаржы қажет екені әзірше белгісіз.