Серік Қонақбаев АІВА президенттігіне ұсынылды
Қазақстан бокс федерациясы AIBA президенті лауазымына Серік Қонақбаевты ұсынды.
Бұл туралы осы федерацияның баспасөз қызметі хабарлады.
«AIBA сайлау туралы ережеге сәйкес, біз барлық ұлттық федерацияларға өз ұсынысымыз туралы хабарладық. Енді олардан біздің үміткерді қолдайтын хат күтіп отырмыз. Кейін біз құжаттарды Халықаралық әуесқой бокс қауымдастығының штаб-пәтеріне жібереміз. Құжаттар тексерілгеннен кейін үміткерлердің тізімі AIBA сайтында жарияланады», – деп хабарлады Қазақстан бокс федерациясының атқарушы директоры Бекжан Бектенов.
Серік Қонақбаев – танымал әуесқой боксшы. Ол спорттық мансабын аяқтағаннан кейін қоғамдық істермен және спорт менеджментімен айналысқан. Ол бокстан екі дүркін Еуропа чемпионы және екі рет Әлем кубогын иеленген. 1980 жылы Мәскеуде өткен Олимпиаданың күміс жүлдегері. Қонақбаев Парламент Мәжілісінің депутаты болған. 2010 жылдан бері AIBA атқару комитетінің мүшесі, 2014 жылдан бері – AIBA вице-президенті және Азия бокс конфедерациясының президенті.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе