Қостанай облысында 77 жастағы зейнеткер қарт анасына шабуыл жасаған ұлын өлтірді.
Бұл туралы Жітіқара аудандық прокурорының орынбасары Руслан Өмірзақовқа сілтеме жасап, “Алау” порталы хабарлады. Оқыс оқиға 28-желтоқсанда болды. Кенеттен шыққан жанжал кезінде 45 жастағы ер адам ас үйдегі табамен анасының басынан және денесінен бірнеше рет ұрған. Осыдан кейін ол 77 жастағы әкесіне де “өлтіремін” деп қоқан-лоқы көрсеткен.
“Ұлының әрекетіне ашуға булыққан әкесі жанында тұрған зілбалғамен ұлының басынан бірнеше рет ұрған. Оқиға салдарынан ер адам қайтыс болды. Осы іске қатысты ҚР Қылмыстық кодексінің 102-бабы, яғни “Қажеттi қорғаныс шегiнен шығу кезiнде жасалған адам өлтіру” бойынша сотқа дейінгі тергеу шаралары жүріп жатыр”, – деді Жітіқара аудандық прокуратурасының өкілі.