Сапарбаев Елбасына Ақтөбенің әлеуметтік-экономикалық өсімін баяндады

Ақтөбе облысының әкімі Бердібек Сапарбаев ҚР Президентіне өңірдің әлеуметтік-экономикалық өсімін баяндады, деп хабарлайды ҚазАқпарат тілшісі.

Өңірге жұмыс сапарымен келген Елбасы Нұрсұлтан Назарбаев Ақтөбе ферроқорытпа зауытында, Ақтөбе рельс-арқалық зауыты мен жылыжай кешенінде, бизнестің әлеуметтік жауапкершілігі аясында салынған бірнеше нысанда болды. Ақтөбелік белсенділермен, кәсіпкерлермен, өнер адамдарымен кездесті. Жұбановтар әлемі орталығын, Шығармашылық академиясы мен Өнер ордасының құрылысын қарап шықты. Сапар кезінде Президентке Ақтөбе облысының әкімі Бердібек Сапарбаев 8 айдың қорытындысын баяндады. Облыстық әкімдіктің баспасөз қызметінің хабарлауынша, өңірде экономиканың барлық секторында өсім бар. Өнеркәсіптік өндірістің индексі 104,9 пайыз,  ауыл шаруашылық өндірісі 102,7 пайыз, инвестиция 130 пайыз деңгейде. Құрылыс кешеніндегі жұмыс көлемі 111,9 пайызды құрап, 337 мың шаршы метр тұрғын үй пайдалануға берілді.

«Кәсіпорындарды жаңғырту аясында мамандардың біліктілігін жетілдіру және қайта даярлау үшін 30 ірі компаниямен келісімге қол қойылды. Бүгінде 10 кәсіпорын жаңғыртылды. 2017 жылы жалпы сомасы 18 миллиард теңге тұратын 20 компанияны жаңғырту көзделуде. Нәтижесінде еңбек өнімділігі 12 пайызға артып, өнімдерді өндіру мен қайта өңдеудің өзіндік құны 3 пайызға төмендейді. Сонымен қатар, осы жылдың бірінші тоқсанының қорытындысы бойынша қабылданған шаралардың арқасында өңдеу өндірісінің облыс экономикасына қосқан үлесі артты. Жұмыссыздық 4,8 пайыз деңгейінде сақталып тұр, яғни биыл 11,3 мың жаңа жұмыс орны ашылды», – деп хабарлады облыс әкімінің баспасөз қызметі.