Оңтүстік Қазақстан облысының Қазығұрт ауданындағы Тұрбат ауылында тұратын Мухтабар Тораева елге «Сақалды апа» деген атпен етене таныс.
Таяуда ол кісі немересі Абдулатифті үйлендіріп, үлкен қуанышқа кенелді. Бұл туралы Замана басылымы жазады. Осынау қуанышты күнде басылым журналистері Мухтабар Тораеваның үйіне арнайы барып, құтты болсын айтыпты. Немере келін ұсынған шайдан ішіп, сақалды апамен тілдесіп қайтыпты.
Кейіпкеріміздің аздап сырқаттанғаны болмаса, әлі тың. Биыл 68 жасқа толыпты. «Құдай бұйыртса, 70 жылдық мерейтойыма «Замана» ұжымын арнайы шақырып, қонақ етсем деген ниетім бар», – дейді ол кісі.
Ал апамыздың сақалы сол күйінде. Жас келгендіктен бе, аздап сиреген, ағарған. Бірақ ұзындығы сол қалпында, 13 сантиметрден аспапты. «Есіме түссе тараймын, әйтпесе оның бар-жоғы да білінбейді. Тек бес уақыт намазымның алдында сумен жуып қоямын, болды», – дейді Мухтабар апа.
Апамен осылай әңгіме-дүкен құрып отырғанымызда үйге ол кісінің бір топ жора-жолдастары кіріп келді. Тойың тойға ұлассын деп тілек білдіруге әрі келіннің қолынан шай ішуге келіпті. Бұл бір сәйкестік пе дерсің, келген қонақтардың арасынан да сақал-мұрты бар бір әйелді байқадық. Сәті түсіп тұрған соң, ол кісіні де сөзге тарттық.
«Мен Мухтабардың досы әрі көршісімін. Маған да сақал балалы-шағалы болғаннан кейін шыққан. Бірақ мен Мухтабар секілді емеспін, жиі қысқартып тұрамын. Ұзын болып өскеніне шыдай алмаймын, – дейді Ёдгор апа. – Бүгінде Мухтабар екеуміз егіз қозыдай болып жүреміз. Жас кезімізде күйеулеріміз бізге бірдей көйлек сатып әперетін. Содан әлгі киімдерді киіп, ауыл-аймақтың той-томалағына баратынбыз. Қатарластарымыздың бәрі бізді көргеннен: «Екі сақал келді, төрді босатыңдар!» – деп қуана қарсы алатын. Қазір де солай, сақалымыздың арқасында сый-құрметке бөленіп жүрген жайымыз бар».
Мінеки, Тұрбатта тұратын сақалды апалардың жағдайы осындай. Апамызды таяуда украиналық бір телеарнадан тілшілер іздеп келіп, сұхбат алыпты.