Ресейдің Тюмень облысы Тобол аудандық соты “Филипп Лис” деген атпен танымал 22 жастағы Филипп Будейкинді үш жылға жалпы қоныстану мекемесіне жіберу жөнінде шешім шығарды. Оны адамдардың суицид жасауына әкелді деп айыптайды.
“Сот процесі кезінде сотталушыға тағылған айыптар дәлелденді”, – дейді судьяның көмекшісі Эльвира Якубова.
Соттың баспасөз қызметінің хабарлауынша, Филипп Будейкин кінәсін толық мойындаған, істеген істеріне өкініш білдірген. Тергеу ісі бойынша айыпталушы 2016 жылдың сәуір, мамыр айында “кәмелетке жасы толмағандар арасында суицидті насихаттаған”.
2016 жылдың мамыр айында “Новая газета” басылымы “Өлім тобы” деген мақала жариялады. Онда “Вконтакте” желісінде жасөспірімдерді суицид жасауға мәжбүрлейтін топ бар екендігі айтылған. Жабық топқа 130 оқушы мүше болған. Кейін әлеуметтік желілердегі қауіпті ойын жайында әлемдік БАҚ хабарлай бастады.