Ресей сыртқы істер министрінің орынбасары Григорий Карасин Кишиневке “қатаң” жауап беруге уәде етті. Бұған дейін Молдова ресейлік бес дипломатты елден шығару туралы шешім қабылдаған еді.
“Әрине, жауабын береміз, ол өте қатал болады”, – деді Карасин 29 мамыр күні. Кишинев ресейлік дипломаттарды “персона нон грата” деп жариялап, елден шығып кетуіне 72 сағат уақыт берді.
“Өте өрескел арандатушылық. Ресеймен арадағы қарым-қатынастың жақсаруын қалайтын президент Игорь Додон бастаған күштерге жасалған соққы”, – деп мәлімдеді Карасин.
Ресейді жақтайтын президент Додон мен батысшыл үкімет арасындағы қайшылық өсіп барады. Бұрынғы депутаттың мемлекеттік құпияны Ресей елшілігінің қызметкеріне берді деген мәліметтің соңы, дипломатиялық жанжалға ұласты.
Молдованың бұрынғы депутаты Юрий Болбочан биыл наурыз айында қамауға алынып, мемлекеттік сатқындық үшін айыпталды. Бұның алдында, оның Ресей елшілігінің атташесі Александр Грудинмен кездесуі туралы бейнеролик жарияланған.