Ақша айырбас орындарында АҚШ долларының күрт қымбаттап, қайтадан арзандауының себебі белгілі болды.
Алдында геосаяси жағдайларға байланысты халықаралық нарықта мұнай бағасы құлдырай бастаған. Доллар бағамы да соған сай құбылды. Бастапқыда қара алтынның бір баррелі 48 доллар болса, ол 4-5 күн ішінде 42-43 долларға дейін арзандады. Алайда өткен сенбі-жексенбіде баға 46-47 долларға қайта көтерілсе, бүгін қымбаттау кезіндегі бастапқы құнын қалыпқа келтірді.
The Wall Street Journal америкалық басылымының жазуынша,
мұнай бағасының қайтадан көтерілуіне 27-маусымда мұнай және мұнай тасымалдаушы компаниялардың серверіне жасалған хакерлік шабуыл түрткі болған. Бұл инвесторлар арасында дүрбелең туғызып, мұнай, орташа шамада, 2 процентке қымбаттады.
Group-IB компаниясындағылар Petya вирусы Ресей мен Украинаның мұнай, телекоммуникация және қаржы компанияларына жаппай шабуыл жасағанын мәлімдеді. Оның ішінде Чернобыль атом электр стансасы да бар. Одан бөлек Италия, Израиль, Сербия, Венгрия, Румыния, Польша, Аргентина, Чехия және Германияның кейбір компаниялары да бұл вирустан зардап шеккен.
Бұдан соң “Касперский зертханасының” директоры Костин Райю бұл вирусты тоқтата алмағандарын, оның әлемді жайлап кеткенін хабарлады. Ал Petya атты қаскөй-вирус компьютерлерді бұғаттап қана қоймай, оны ашу үшін 300 доллар ақша сұрайтын көрінеді.
“Егер өндіріс тоқтап қалса, оны қайтадан қалпына келтіру қиын болады. Мұндайда биржадағы сатушылар өте сақ позицияға көшеді. Әрине, баға өседі, оны ешкім тоқтата алмайды”,- деп атап өткен ICAP брокері Скотт Шелтон.
Демек, мұнай бағасы көтеріле беретін болады. АҚШ та соңғы оқиғадан соң шикізат өндірісі көлемін күрт төмендеткен. Сондықтан бүгін халықаралық нарықта мұнай бағасы тағы да тиындап қымбаттады. Осы жағынан алғанда,
Қазақстанда доллар бағасының қатты қымбаттауы болжанбайды. Керісінше, қазіргі арзан баға – заңды құбылыс.
Айта кетелік, еліміздің ақша айырбас орындарында өткен апта басында 1 АҚШ доллары 330 теңгеге дейін қымбаттап, соңына қарай 326-325 теңгеге түсті. Ал бүгін Алматыдағы ақша айырбас пункттерінде 1 АҚШ доллары 321 теңгеге сатылып, 324 теңгеден сатып алып жатыр.