Петропавл тұрғыны 10 грамм героин үшін 10 жылға сотталуы мүмкін
Петропавл қаласының 34 жастағы тұрғыны полиэтиленді пакетпен есірткілік зат өткізбек болған жерінен құқық қорғаушылардың қолына түсті, деп хабарлайды «ҚазАқпарат» ХАА тілшісі.
Қалалық наркобизнеске қарсы күрес бөлімінің қызметкерлері облыстық аппараттағы әріптестерімен бірге жедел іздестіру шараларын жүргізген. Операция барысында 34 жастағы жігіт ұсталды. Арнайы қызметкерлер оның жалға алған үйін тексере келе 4 түйіншекке оралған күдікті затты тауып алған. Сараптама қорытындысы бойынша табылған зат 10 грамм мөлшеріндегі героин болып шықты.
ҚР ҚК 297-бабы бойынша сот алды тергеу амалдары жүргізіліп жатыр. Айыпталушының кінәсі дәлелденсе, ол 10 жылдан 15 жылға дейін бас бостандығынан айырылуы мүмкін. СҚО ІІД баспасөз қызметінің хабарлауынша, жыл басынан бері әр түрлі деңгейдегі 200 келіге жуық есірткілік зат тәркіленген. Оның ішінде 190 грамнан астамы героин болып отыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе