11-қыркүйекте ҚР Парламенті Мәжілісінде қазақ тілінің латын қарпіне көшудің бірыңғай стандартын енгізу бойынша тыңдалым болады.
Бұл туралы ҚР Парламенті Мәжілісінің баспасөз қызметі хабарлады.
Бұл отырысқа Мәжіліс төрағасы Нұрлан Ниғматулин, ҚР Премьер-министрдің орынбасары Ерболат Досаев, Сенат және Мәжіліс депутаттары, мемлекеттік орган өкілдері қатысады деп күтіледі.
Жалпы талқыға әліпби жобасын әзірлеушілер – Ахмет Байтұрсынов атындағы тілтану институтының және Шайсұлтан Шаяхметов атындағы республикалық тілдерді дамыту жөніндегі үйлестіруші-әдістемелік орталықтың басшылары, жоғары оқу орындарының ректорлары, ғылым және мәдениет қайраткерлері, ғалымдар мен сарапшылар, сол секілді шетелдік қоғамдық ұйымдар мен БАҚ өкілдері шақырылған.
Парламенттік тыңдалымнан соң алға тартылған ұсыныстарға сәйкес шешімдер қабылданбақ.