Өзбекстан президенті Шавкат Мирзиёев 20 маусымда Өзбекстанға тиесілі мәдени құндылықтарды шетелден қайтарумен айналысатын орталық құру туралы қаулы қабылдады.
Орталық мақсаттарының бірі – шетелдегі Өзбекстанға қатысы бар мәдени құндылықтар банкін құру, оларды ғылыми тұрғыда зерттеу. Бұған қоса, орталық мәдени құндылықтарды шеттен әкелу және сыртқа шығарудың заңдылығын тексереді.
Президент қаулысында жәдігерлерді елге қайтаруға арналған келіссөздер туралы да сөз болған.
“Совет заманында Хиуа, Самарқан және Бұхара мұражайларында сақталған көптеген алтын бұйымдар, сонымен бірге бұрынғы өзбек хандарының жәдігерлері Ленинградқа тасылған. Қазір солардың көбісі Эрмитаждың Шығыс бөлімінде сақталған. Біздің президент соларды елге қайтарғысы келеді”, – деді министрлік маманы.