Қазақстан мен Өзбекстан арасында жүк тасымалы рұқсат құжатынсыз іске асырылады, сондықтан екі елдің тасымалдаушылары үшін шекараны кесіп өтуде ешқандай қиындық жоқ, деп мәлім етті көрші елдің автомобиль және өзен көлігі мемлекеттік агенттігі.
Өзбек билігі екі елдің шекарасында пайда болғаны жүк көліктерінің кептелісіне қатысты түсінік берді, деп хабарлайды Sputnik Өзбекстанға сілтеме жасаған Sputnik Қазақстан.
“Қазақстан мен Өзбекстан арасында халықаралық автомобиль тасымалдары туралы екі жақты келісімге қол қойылған. Осы келісімге сәйкес екі мемлекет арасындағы және олардың аумағындағы транзит рұқсатсыз негізде іске асырылады. Қазақстаннан Өзбекстанға немесе керісінше біздің елден көрші мемлекетке тасымалдау кезінде ешқандай проблема жоқ. Сонымен қатар, осы аумақтар арқылы транзитпен өткенде де ешқандай қиындық жоқ”, — деді Sputnik тілшісіне Өзбекстанның автомобиль және өзен көлігі мемлекеттік агенттігі басшысының орынбасары Шаалим Шавахабов.
Оның айтуынша, үшінші елдерден немесе осы елдерге жүк рұқсат қағаздары негізінде тасымалданады.
“Биылғы жылға Өзбекстанның автомобиль және өзен көлігі мемлекеттік агенттігі мен Қазақстанның құзырлы органы арасында 1200 рұқсат бланкісімен айырбас болды. Қазіргі уақытта қазақстандық тарап шамамен 700 бланкіні пайдаланған. Сондықтан жыл соңына дейін бланкі жетеді”, — деді ол.
Өзбек шенеунігінің айтуынша,
шекарадағы жағдай заңға бағынбайтын тасымалдаушылардың кесірінен туындап отыр.
“Кейбір тасымалдаушылар қолында рұқсат бланкісі болмаса да, шекараға келіп, Өзбекстанға өткізуді талап етеді. Бірақ, заңнамаға сәйкес ел аумағына үшінші елдерден жүк тасымалдаған кезде міндетті түрде рұқсат бланкілері рәсімделуі керек”, — деп атап өтті агенттік басшысының орынбасары.
Read more: