ОҚО полиция қызметкерлері Ресейде екі кісі өліміне қатысы бар деген күдікпен 19 жыл бойы іздестіруде жүрген күдіктіні ұстады.
Бұл туралы Baq.kz хабарлайды.
ОҚО ІІД Шардара аудандық ішкі істер бөлімінің полиция қызметкерлері жедел-іздестіру жұмыстарын жүргізу барысында Ресей Федерациясында 1999 жылы екі кісі өліміне қатысы бар деген күдікпен іздестіруде жүрген Шардара қаласының 1963 жылы туған тұрғынын ұстады.
Полиция қызметкерлері күдікті азаматтың Шардара ауданында тіркеуде тұрғанын, оның тұрмыстық химия заттарын сататын фирмаға сауда өкілі болып жұмыс жасап жүргенін, сондай-ақ, басқа атпен өзін таныстырып жүргенін анықтады.
Шардара аудандық ішкі істер бөлімінің криминалды полиция қызметкерлері анықтағандай 54 жастағы күдікті азаматтың Шардара қаласында туысқандары бар екені анықтады. Ол негізінде Шымкент қаласында тұрған, алайда мекен жай бойынша оны таба алмаған. Полицейлер жедел-іздестіру іс-шаралар барысында Арыс қаласындағы базардың бірінен күдікті азаматты ұстады. Сотқа дейін тергеу жүргізілуде.
Жиналған материалдар процесуалды шешім қабылдау үшін сотқа жіберілді.