Оқушы қыздардың мектепке хиджаб киіп келуіне рұқсат берілді
Енді Шешенстандағы оқушылар білім ордасына діни мәндегі киім мен ұлттық өрнектері бар киімдерді киіп келе алады.
“Шешен Республикасының білім беру ұйымдарындағы тәрбиелік саясаты ұлттық дәстүрге және білім алушылардың діни сенімдеріне кедергі келтірмеуі тиіс”, – деді парламенттегі білім комитетінің басшысы Бекхан Хазбулатов.
Міндетті форма енгізілген білім мекемелері білім алушының ұлттық негіздегі өрнегі бар немесе діни сеніміне байланысты киіп келген киіміне түсіністікпен қарап, олардың құқығымен санасу керек. Әрине, бұл жерде жағдай федералды заңға қарсы келмеуі тиіс және азаматтардың денсаулығына кері әсер етпегені жөн.
Хиджаб туралы пікірталас Мордовия басшылығының Белозерь ауылындағы мектеп оқушылары мен ұстаздарының мұсылмандық белгілері бар киімдерді киюіне тыйым салған соң басталды. Олар 2018 жылы өтетін футболдан әлем чемпионаты қарсаңында осындай тазалық шарасын өткізу керек деп шешіпті. Білім министрі Ольга Васильева Конституциялық соттың мектепке хиджаб киіп келуге қарсы үкім еткенін мәлімдеді.
Бұған жауап қатқан Шешенстан басшысы Рамзан Қадыров Ресей Конституциясының кез-келген азаматтың ар-ожданы мен сеніміне кепілдік беретінін еске салыпты. Кейінірек ол қоғамдық орындарда діни мәндегі киімдер киюге тыйым салу қоғам үшін өрескел әрекет деп бағалады.
Бұдан кейін Ресей президенті жанындағы адам құқықтары жөніндегі кеңес мектеп оқушыларының діни киім киюін заңмен реттеуді ұсынды.
Дереккөз: Stan.kz
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе