Назарбаев: «Күлтегін жазған «Мәңгілік ел» ұғымын ұлттық идеяға айналдырдық»
Елордада өткен ҚР Тәуелсіздігінің 25 жылдығына арналған салтанатты жиында Елбасы барша қазақстандықтар мен шетелдегі достарды мерекемен құттықтады.
Мемлекет басшысы жасаған баяндамасында еліміздің бастан кешкен оқиғаларын еске түсіріп, осы күні жеткен жетістіктеріміз туралы айтты. 90 жылдары елімізден жоқшылықтың салдарынан шекара асып кеткен қандастарымыз Атамекеніне қайта оралып, оларды баспанамен қамтамасыз ету қарқынды түрде жүріп жатқанын хабарлады. Сондай-ақ Елбасы отандық медицинаның даму жылдарын еске салды. «90-шы жылдардың басындағы мен қазіргі медицина саласының деңгейі жер мен көктей», – деді Н.Назарбаев.
«Елімізде сәбилердің дүниеге келуі 55 пайызға өсті. Жас ұзақтығы ХХ ғасырда 35 болса, қазір 72 жас, 2050 жылға қарай 82 жас болатынына сенемін», – деді Мемлекет басшысы. Ауыл шаруашылығы дамыту басты назарда екенін, қазір Қазақстан 119 елге 2500 тауарды экспорттайтынын айтты Елбасы.
«Біз 1500 жыл бұрын Күлтегінде жазылған «Мәңгілік ел» ұғымын ұлттық идеяға айналдырдық. Астананы әлемнің мәңгілік қалаларының бірі болуына бар күшімізді саламыз. Біздің қазіргі кәсіпкерлеріміздің миллионер әкелері болған жоқ. Бүгінгі жеткен жетістіктеріне бәрі өз күшімен жетті. Мен ел дамуына үлес қосқан әрбір қазақстандыққа айрықша ықыласымды білдіремін. Еліміздің ең ұлы мерекесі, асқар асуымыз Тәуелсіздіктің 25 жылдығымен шын жүректен құттықтаймын! Ұлы белестерді бағындыруда Алға Қазақстан! Ұлы мақсаттарды орындау жолында алға халқым!», – деді Мемлекет басшысы салтанатты жиында.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе