Қытайда „Мен әншімін„ тележобасында өнер көрсетіп жатқан Димаш Құдайберген ауырып тұрып сахнаға неге шыққанын айтып берді.
Бұл туралы ол Қытайдағы ең танымал Sina Weibo (Twitter-дің баламасы) сайтына берген сұқбатында мәлім етті. Димаштың қазақша берген сұқбаты жариялана салысымен, оны 4 сағат ішінде 1 миллион 800 мың адам қараған.
– Мен де ет пен сүйектен жаратылған адаммын ғой. Сондықтан менің ауырып қалуым қалыпты жағдай. Адамдардың мен үшін қатты алаңдағанын көріп, өзім шошып, қобалжып қалдым. Бір нәрсені бүлдіріп қойған секілдімін. Қалай дегенмен де Қытай елінің ауа-райы маған жат. Ешқашан мен ұзағынан осылай елден жыраққа кетіп көрмеппін. Рас, маған қатты суық тиді. Дауысым шықпай қалды. Ыстығым көтеріліп тұрып алды. Қырсық қылғанда, келесі сынаққа бір-ақ күн қалған. Сондықтан шалт қимыл жасау керек болды. Амалсыздан ауыр екпеге жүгіндік. Ол екпе дауысты 10 сағатқа уақытша қалыпқа келтіреді. Соны қабылдадым. Одан тыс тәулігіне 4 екпе салдыртып жаттым…
Әрине, денсаулығыма байланысты фонограмма қолдануыма болар еді. Бірақ
мен жауапкершіліктен аттай алмаймын. Менің табиғатым сондай. Көптен өзімді ешқашан жоғары қойған емеспін. Оларды алдай да, сата да алмаймын. Бұл бір жағынан. Екінші жағынан, мен үшін көрерменнің ықыласы өте қымбат. Көрермен ықыласы мені шабыттандырады, менің алға жылжуыма жол ашады, мені бақытқа бөлейді. Біз біртұтас әлембіз. Біз бір-бірімізге адалмыз. Оны былғауға болмайды. Сондықтан да менің фонограммаға жүгінуге дәтім бармады.
Дәрігерлер 3 аптада дауысың жәймен қалпына келеді деп айтты. Мен сол уақытты қазір күтіп жүрмін. Бірақ ол ескертуге қарамай, арасында ән орындап қоямын.
Оның себебін жаңа түсіндірдім ғой…
Осы сұқбатында Димаш болашақ жоспарымен де бөлісті.
– Болашақ жоспарларым туралы әлі айтқым келмейді. Өйткені қазақтар ырымшыл халық. Мен ырымға қатты сенемін деп айта алмаймын. Дегенмен деп қоямыз ғой. Сондықтан алға жүгіріп, болжам жасағым келмейді. Бір анығы – бұл жоба менің бағымды ашты.
Бір жақсы жаңалықпен күштілеп тұрып қуантамын. Бұл да анық нәрсе. Әрине, бұл жоба үлкен көрермендерді маған жинап бергеннен кейін,
мен міндетті түрде жұмысымды Қытай елінде де жалғастыратын боламын.
Бұл сахнаның төріне шығу оңай болған жоқ. Осынша көрермен сүйгеннен кейін оларға мен қызмет етуім керекпін. Солардың көңілінен шығып, ренжітіп алмас үшін барымды салатын боламын. Бұл екінің бірінің қолынан келе бермейтін жұмыс, сол секілді екінің бірінің басына берілмейтін бақ.