Мұғалімдердің жалақысы соңғы бес жылда қалай өзгерді?

Ауылдық жерлердегі мұғалімдерге ерекше көңіл бөлініп, олардың жалақысы қалалық әріптестеріне қарағанда кемінде 25%-ға жоғары белгіленген.

Қазіргі таңдағы орташа жалақы

2024 жылдың қорытындысы бойынша мұғалімдердің орташа айлық жалақысы 1 мөлшерлеме (16 сағат) үшін 352 мың теңгені, ал ауыл мұғалімдері үшін 435 мың теңге болды. Ұлттық білім беру деректер базасының мәліметінше, елдегі педагогтердің жартысы 1,5 мөлшерлемемен (24 сағат) жұмыс істеп, айына орташа 581 мың теңге жалақы алады.

Қосымша ынталандыру шаралары

Қазақстан білім беру саласында жетістікке жеткен педагогтерді ынталандыру жүйесін дамытқан елдердің бірі. Олимпиада жеңімпаздарын дайындаған, мемлекеттік марапаттарға ие болған мұғалімдерге қаржылай сыйақылар беріледі. 2023 жылы 89 педагог мемлекеттік сыйақы лауреаты атанып, 3,6 млн теңге (1000 АЕК) көлемінде марапат алды. Олардың қатарында Еңбек ерлері, Қазақстанның еңбек сіңірген ұстаздары және «Үздік педагог» байқауының жеңімпаздары бар.

Соңғы бес жыл ішінде Қазақстанда мұғалімдердің еңбекақысы айтарлықтай өсті. Мемлекет тек жалақыны арттырумен шектелмей, қосымша үстемеақылар мен марапаттау жүйесін енгізу арқылы педагогтердің әлеуметтік мәртебесін жақсартуға бағытталған маңызды реформаларды жүзеге асырды.