Қол астындағы жұмысшыларының қаза болуына байланысты Астанадағы құрылыс нысанының басшысы қамауға алынды.
Бұл туралы қалалық ішкі істер департаментінің баспасөз қызметі хабарлады.
«Астана қалалық Ішкі істер департаментінің тергеу басқармасы Алаш көшесіндегі құрылыс нысанында екі құрылысшының қаза болу фактісіне қатысты ҚР Қылмыстық кодексінің 277-бабы, яғни „Абайсызда екі және одан көп тұлғаның өліміне алып келген құрылыс жұмыстарының қауіпсіздік ережелерін бұзу„ бойынша сотқа дейінгі тергеуді бастады», – деп хабарлады ІІД-ден.
«Жүкті арту-түсіру жұмыстарына жауапты құрылыс нысанының басшысы, 1970 жылы туған Қазақстан азаматы, ҚР Қылмыстық-процессуалдық кодекстің 128-бабына сәйкес ұсталып, ІІД-нің уақытша ұстау абақтысына жеткізілді. Қажетті сараптамалар тағайындалды. Тергеу жүруде», – деп мәлім етті баспасөз қызметінен.
Еске салайық, бүгін елордада құрылыс нысанында жабынды плитаның және қабырғаның опырылып құлауы салдарынан екі адам мерт болды, үшінші жұмысшы ауруханаға жеткізілді. Қайғылы оқиға Сарыарқа ауданындағы Алаш көшесінде бой көтеріп жатқан құрылыс нысанында сағат 11.56-да болды. Кейбір деректерге сүйенсек, мерт болған екеу мен тағы бір зардап шегуші Өзбекстан азаматтары екен.