“ҚазАгроҚаржы”АҚ орталық аппаратының кеңсесінде топ-менеджерлер төбелескен, олардың осы әрекеті бейнебақылау камераларына түсіп қалған.
Видеоны берген дереккөздің мәліметінше, жандалдасқан екеудің бірі Басқарма басшысының орынбасары Қанат Тұрсынқұлов та, екіншісі департамент директоры Ербол Тәшенов, деп хабарлайды Тengrinews.kz.
Куәгерлердің айтуынша, компанияның топ-менеджерлері “ҚазАгроҚаржы” АҚ орталық аппаратының кеңсесінде (бесінші қабатта, топ-менеджмент бөлмесінде) спирттік ішімдік ішіп отырған. Бұл Тәуелсіздік күні қарсаңында болған. Ішімдікке сылқия тойып алған қайта оңалту департаментінің директоры Ербол Тәшенов басқарма басшысының орынбасары Қанат Тұрсынқұловты ұрған. Осы кезде төбелес басталған. Төбелес барлық қызметкерлердің көзінше болған және қызметкерлер жанжалдасқан екеуді ажыратқан.
“ҚазАгроҚаржы” АҚ өкілдері бұл жағдайды кішігірім келіспеушілік деп бағалап, оны бір үлкен дау немесе жанжал деуге болмайтынын айтты.
“Бұл жәй кішігірім келіспеушілік қана, қызметтік бабына еш қатысы жоқ. Сонымен қатар, бұл оқиға жұмыс уақыты аяқталғаннан кейін (21.00-де) болған. Медициналық көмекке жүгінудің немесе құқық қорғау органдарына хабарласудың еш қажеті болмаған. Қазіргі уақытта екеуінің арасында ешқандай араздық жоқ”, – делінген ресми сауалға келген жауапта.
“ҚазАгроҚаржы” АҚ Әдеп кодексі бойынша екеуіне де тәртіптік шаралар қолданылатынын айтты.