23-қаңтарда Астанада өтуі жоспарланған Сирия дағдарысына қатысты бейбіт келіссөздер (Астана процесі) тараптардың ымыраға келуі үшін барынша маңызды, деп хабарлайды ҚазАқпарат.
Бұған қоса, әлемнің түрлі елдері, оның ішінде АҚШ келіссөздердің өту орнын таңдауға түсіністікпен қарауда. Бұл пікірді бүгін Қазақстанның стратегиялық зерттеулер институтының директоры Ерлан Қарин білдірді.
«Алдағы уақытта өтетін кездесуге қатысты халықаралық ұйымдардан, әлемнің саяси астаналарынан түсіп жатқан хабарларды, пікірлер мен сілтемелерді жіті бақылап отырмын. БҰҰ шенеуніктері өздерінің өкілдерін жіберуге дайын. Біз Вашингтон тарабынан орын алған белгіні естідік. Яғни, түсіністік бар», – деді ол.
«Екіншіден, әңгіме кең ауқымды сирияаралық келіссөздер жайында болып отырған жоқ. Бұл орайда, сарапшы ретінде айтар болсам, әңгіме ымыраға келу жайында болмақ. Осы орайда, бұл процес бүкіл сириялық дағдарысты шешеді деуге болмайды. Бірақ, бұл алда болуы мүмкін кездесудің маңызын төмендетпейді. Тіпті, кейбір мәселелерге қатысты, кейбір территория бөлігіне қатысты уағдаластыққа қол жеткізілгеннің өзі алға ілгерілеушілік болмақ», – деді Ерлан Қарин.
Институт басшысы мұндай бейіндегі бейбіт келіссөздердің барынша күрделі әрі қатпарлы процесс екендігін және ұстанымдарды келісу бір мезетте бірнеше деңгейде, сонымен қатар бірнеше форматта жүргізілетіндігін баса айтты. Сол себепті оның қандай да бір нәтижесін болжау мүмкін еместігін ескертті.