ҚР бала құқықтары жөніндегі уәкіл Зағипа Балиева 7 жасар баланың Астанада уақытын қалай өткізіп жатқанын айтты.
„Бала қазір әжесімен пәтерде. Бүлдіршінді көруге, сөйлесуге тыйым салынбаған, тек оған зорлау ісіне қатысты ешқандай сұрақ қойылмауы керек„ – деді арнайы баспасөз мәслихатында Зағипа Балиева ханым деп хабарлайды Sputnik Қазақстан.
“Баланы көруге ешкім шектеу қойып отырған жоқ. Оған тек болған оқиғаға қатысты сұрақ қоюға тыйым салынған. Ал басқа сұрақтар бойынша сөйлесіп, көруге болады.
Кеше ол дүкенге барды, бүгін түстен кейін медициналық тексерістен өтеді. Кездескілеріңіз келсе, әрине, кездесе беріңіздер.
Бірақ бір ғана шартпен – тергеуге қатысты ешқандай сұрақ қоюға болмайды”, — деп қадап айтты Балиева.
Депутаттың айтуынша, қазір оңтүстікқазақстандық бүлдіршін елең-алаңсыз ойнап, педагогтармен сабақ оқып жүр.
“Қазір “Асыл бала” сыйлаған телефонмен ойнап жүр. “Жас ұлан” (республикалық мектебі) түрлі қызықты, ақыл-ойды дамытатын ойындар жүктелетін планшетті сыйға тартпақшы. Сол планшетті күтіп жүр. Кеше еріктілер келіп, онымен танысты.
Мұның бәрін айтып отырғаным: бала қоғамнан оқшау емес, оны ешкім жасырып отырған жоқ”
, — деп түсіндірді Балиева.
Еске салып өтсек, Бала құқықтары жөніндегі уәкіл Зағипа Балиева Шымкент қаласына барып, зорлыққа ұшырады деген 7 жасар бүлдіршінді әжесімен бірге Астанаға алып келді. Қазір баланың жағдайы жақсы, онымен психологтар жұмыс істеп жатыр.